Sobab lamo bona nunggu untuk monang ni .. biar lah den buek sikit entry pasal bola kek blog ni. Den maso mudo2 dulu pun peminat gak bolasepak ni .. tapi zaman tu memang best lah kalau ko studium tu .. tak macam sekarang takut nak pogi .. kang nayo kono molotov tu .. sesio kalo cacat semato-mato sobab nengok bola yang bulat!!Teringat den ada sekali pergi Studium Nasional .. maso tu mudo lah anak pun kocik2 tinggal ngan mak mertuo .. final Selangor lawan mano ntah tak ingat... apo yg den ingat maso nak masuk studium tu .. punyolah sosak .. cicir selipar den!! den tongah2 .. dopan abang ipar, belakang den HeroBosa ... ntah sobab bersosak tu boleh pulak tercabut selipar kono pijak .. nak ambik tak buleh dah kang nayo kono lunyah .. so masuk yo lah kaki ayam!! *HeroBosa orang Selangor, so den konolah sokong .. masa tu N9 mana masuk buku!*
Kalo zaman den dulu, ganeh gak lah penyokong2 .. tapi sekadar menjorit2 .. boo sano, boo sini .. pret sano pret sini ngan trumpet tu ... paling kuek pun baling botol air mineral tu yo ... takdo bawak molotov dalam studium tu! menakutkan botul lah bebudak zaman sekarang ni ... studium tu den nampak cam medan porang malam tadi ... tu nengok kat TV, kalu kek situ lobih lagi lah agak eh kan? macam hilang pertimbangan sekadar kalah main bola yo baru .. kenapo korang tak bersomangat camtu bilo Islam di injak2?? den agak kalo camtu lah korang buek maso orang perlekehkan hukum2 Allah kek dunio ni .. takdo orang berani nak perlekehkan ugama kito kan?
Apo pun my HeroKocik memang seronok habih lah malam tadi ... Negeri Sembilan monang. "sekarang adik bangga jadi orang Negeri Sembilan!" umanggg selamo ni dio tak banggo jadi orang N9 ...
Saksikanlah gol pertama yang dibuek oleh ShahurAin yang memang cantik lah pado mato den ...
Welldone boys !!
Hobin jang hobinnn !!
p/s : sengajo buek entry ni slang noghori sobab cam raso soronok pulak jadi orang N9 dan jugak supayo anak2 yang kek noghori omputeh ngan noghori shahrukhan tu dapek lah prektis lidah !!
Kepada nieces n nephews yang rakyat selangor tu ... sobar yo lah !!
